الشخصيه شبه الفصامية

اضطراب الشخصيه شبه الفصامية Schizoid personality disorder وغالبًا بيختصر إلى SPD أو SzPD)

في الموضوع ده هنتكلم عن نموذج للشخصيه اللي بنشوفها كتير في الرسامين .الكتاب . الفلاسفة . الموسيقيين . المبرمجين ..💻👨‍🎨

نموذج للشخصية بيكون الشخص شايف نفسه فيها عبقري ومبدع بالرغم إن اللي حواليه بيكونوا شايفينه حالم ووحيد ☹️!!

لما بنيجي نتعامل معاه في الحياة بنلاقيه مش بيبص لينا كتير ومش بيعرف يفتح مواضيع ومش عايز حتى يسمع منك وقت طويل .. بيكون كل اللي عايزه إنه يخلص مشهد التواصل معاك بسرعة ولا مبالاة ويرجع بسرعة تاني لغرفته المظلمة 🔅

للأسف الشخص ده بيكون صعب جدا يجي العيادة عشان المشكله دي …. لإنه ببساطة شايف إنه فريد من نوعه وإن هو ماشي على درب كتير من الفلاسفة والكتاب والمبدعين والعباقرة ✍️👨‍🎨

طيب إيه الإضطراب ده .. وهل هو له علاقة بالفصام ولا لأ 🤔!

هنشوف ده 🤌.. بس في البداية كده هنقول نبذه سريعة ونبدأ بعدها نتكلم بالتفصيل 👌

أولا الشخص ده صعب جدا إنه يقدر يحل مشاكله لإن كل ما يحس إنه إجتماعيا مش زي الناس يبرر ده لنفسه ويقول لنفسه 🌠
( أنا شخص فريد من نوعي – أنا طريقتي صح لكن مع ناس مش بتقدر – وطول الوقت بيبرر زي ماهنشوف )

شخصية النهارده هو شخص بيفضل العزله الاجتماعيه وإنه يعيش لوحده في سلام عن إنه يكون مع مجموعة من الناس زي الأصحاب أو الإخوات أو حتى مراته وولاده 👨‍👩‍👧‍👧!!!
( يبرر ويقول مش متلاقيين ثقافيا )

شخصية النهارده ما بيقدرش يشارك اللي حواليه بتعبيرات عاطفيه قويه . يعني لا يقدر يحب بزيادة ولا يقدر يدي اللي حواليه حنان زياده 💔!!!
( يبرر ويقول هما اللي مش عارفين يفهموني – مش بيقدروا يفهموا طريقة حبي )

شخصية النهارده عادة مابيتجوزش ولو اتجوز عادة بيطلق لإنه لا بيحب الجنس الاخر .. ولابيستمتع بالجنس ..ولا حتى يفرق معاه ولو فرق الجنس معاه يبقى لمجرد تفريغ متعه مش علشان يبقى وسيلة تواصل وتراحم مع الطرف التاني 🫂 !!!
( يبرر ويقول أنا ربنا خلقني لمهمة أفضل من دي )

شخصية النهارده ما بيختارش غير الأنشطه الفردية والشغل اللي فيه أقل عدد من الناس .. وبيحب عادة يشتغل بالليل 💻🎮🧑‍💻!!!
( يبرر ويقول كل الناس مش موثوق فيها وغير ملتزمين )

شخصية النهاردة قليل أوي الحاجات اللي تبسطه 😔!!!
( يبرر ويقول أنا متعتي في حاجات أكبر من كده بكتير )

شخصية النهاردة مالوش تقريبا علاقات إجتماعيه ولا أصحاب مقربين ولا حتى أقارب يثق فيهم غير شخصين أو تلاته بالكتير إذا وجدوا 👨‍❤️‍👨

من الآخر الشخص ده بيبقى كإنه “مُراقِب” للحياة أكتر من إنه مشارك فيها.

طيب إيه أعراض الإضطراب ده بالتفصيل 🤔؟؟

فيه مجموعة كده من الأعراض اللي بتميز الأشخاص المصابين بإضطراب الشخصيه شبه الفصامية واللي من خلالها بنعرف نميزهم في حياتنا بسهولة 👀:

1• إنهم منعزلين عاطفياً وباردين في مشاعرهم وغير مبالين. وده شيء بيعملهم صعوبة في التعامل مع الناس لكن على الرغم من ده مش بيكونوا معتزلين الناس ☃️🥶.
( يعني تلاقيهم مش بيحاولوا ولا عايزين يقربوا أوي في علاقاتهم مع الأشخاص اللي حواليهم ..سواء كانت خطيبه أو زوجة أو حتى أولادهم لكن بيكون متعايش معاهم من بعيد لبعيد عادي )

2• بيواجهوا صعوبة في إقامة علاقات شخصية أو حتى التعبير عن مشاعرهم بشكل هادف

. ( مش بيعرفوا يدوا الحب بتفاصيله ولا بيعرفوا يكسبوا ولاء الناس العاطفي 😍)
نتيجة لده بيكون تواصلهم مع الناس مختصر جدا وغير فعال 🙇‍♀️. ( وده اللي بيخليهم يكونوا حاسين بالرضا .. بمعنى إن علاقتهم مع الناس مبنية على فكرة أنا بعمل الواجب معاك بما يرضي الله ..ومش عايزك حتى تعمل معايا الواجب ولاتقرب مني )

3• الأشخاص المصابين بالإضطراب ده بيشعروا بالخنقة والرغبة في تحرير نفسهم لو حد انتهك مساحتهم الشخصية.
( لا بيحب حد يزوره ولا يقضي وقت طويل يسمح للناس إنها تدخل في حياته )

🤏 4• مش بيتوقعوا أي مجاملات اجتماعية وبيميلوا إنهم يكونوا أسعد في العلاقات اللي مافيهاش مطالب عاطفية أو حميمية من شريكهم 🙇‍♀️.
( مش عايز منها لا حب ولا اهتمام ولا جنس هو عايز منها تعمل الواجبات اللي عليها وتسيبه في حاله مع أفكاره وأنشطته الفردية )

5• مش شرط يتجنبوا الأشخاص بس تكوين العلاقات بيكون بناءً على الأنشطة الفكرية أو الجسدية أو العائلية أو المهنية أو الترفيهية، المهم مايكونش فيه احتياج لعلاقة حميمية أو عاطفية. ولو فشلوا في تحقيق ده بيفضلّوا العزلة ..
وعادة بتقتصر الصداقة على شخص واحد وغالبا بيكون عنده نفس الأعراض

🟩 ملحوظة 👌:

بالرغم إن في إعتقاد سائد إن الأشخاص المصابين باضطراب الشخصية الشبه فصامية راضيين وغير مدركين لمشاعرهم ، كتير منهم وخصوصا الأذكياء واللي اضطرابهم مش كبير بيدركوا إختلافاتهم عن الآخرين. بدليل إن بعض الأفراد اللي بيتعالجوا تلاقيهم بيقولوا “الحياة تمر بنا” .. أو بيحسوا وكأنهم بيعيشوا جوا صدفة … أو شايفين نفسهم “فقدوا الحافلة” وبيتكلموا عن مراقبة الحياة من مسافة بعيدة😔

طيب إيه أسباب الاضطراب ده 🤔؟؟

للأسف مافيش سبب مؤكد لحدوث اضطراب الشخصية الشبه فصامية بس كتير من الدراسات بتأكد إن في رابط جيني بينه وبين اضطراب الفصام

طب إيه نسبة انتشار الإضطراب ده 🤔؟؟

1. الSPD للأسف ده من الاضطرابات المدروسة بشكل سيء وقليل ..وده بسبب صعوبة إيجاد علاقة قوية بين المصاب والمعالج !!
وعلشان كده الدراسات بتتراوح بين موجود بنسبة أقل من ١٪؜ لنسبة ٤٪؜ وبعض الأبحاث وصلته ل ٧,٥٪

؜2. كمان الإضطراب ده بيكون أكتر شيوعاً في الرجاله عن الستات

طيب إيه هو مسار ومآل الإضطراب ده 🤔؟؟

1. زي باقي اضطرابات الشخصية بتبدأ الأعراض بتاعته في سن المراهقة المبكر أو أواخر مرحلة الطفولة.👶
2. بعض الأبحاث بتقول إن الإضطراب ده هو أكتر واحد من إضطرابات الشخصية بيأثر على الأداء العام بتاع الشخص في حياته بصورة ملحوظة🤯

طيب إيه هو علاج الإضطراب ده 🤔؟؟

للأسف نادر جدا إن الأشخاص اللي بيعانوا من الاضطراب ده إنهم يتقدموا لطلب المساعدة من تلقاء نفسهم.. وعادة بييجوا علشان سبب نفسي أخر غير اضطراب الشخصية الشبه فصامية ..
وعلشان كده احنا كمعالجين بنعتبره واحد من أصعب أنواع اضطرابات الشخصية من ناحية العلاج 🤭.. وده لإن الأشخاص أصلا بيكونوا مش مؤمنين إنهم عندهم مشكلة ومش شايفينها لإنهم دايما شايفين إن نقص تواصلهم مع الناس بسبب عبقرية منهم الناس مش بتقدر تفهمها !!
كمان عدم رغبته في تكوين علاقه حميمه و اللي بتميز الحالة دي بتخلي من الصعب على الشخص المصاب إنه يتابع مع المعالج أو الطبيب وبالتالي بيكون صعب تكوين علاقة علاجية معاه👨‍⚕️.

العلاج الدوائي 💊:

للأسف لحد دلوقتي مافيش حاليا أي أدوية معتمدة ومخصصة لعلاج الاضطراب ده .. لكن بيتم التدخل الدوائي في بعض الحالات اللي بتكون فيها الأعراض شديدة ..أو في حالة وجود مشكلة أخرى تكونت بسبب الاضطراب ده زي الاكتئاب أو القلق.

العلاج النفسي 👩‍⚕️:

بيتعالج اضطراب الشخصيه شبه الفصامية ده عادة بالعلاج النفسي والجلسات النفسية مع الدعم المناسب وهو ده أساس العلاج .. لإن ده اللي بيخلي الأشخاص اللي بيعانوا من الاضطراب ده إنهم يديروا أعراضهم ويتعاملوا بشكل أكثر فعالية في حياتهم اليومية 👏 أغلب التركيز في العلاج النفسي بيكون على ..

1. تنمية مهارات التأقلم
2. تدريبهم على بناء التعاطف والثقة والتواصل
3. تدريبهم على احترام الذات
4. تدريبهم على زيادة الثقة بالناس أكتر والحفاظ على العلاقات الاجتماعية ومهارات الاتصال وقدرات التأقلم العامة.
5. بنعلم الأشخاص دي برده إزاي يتعرفوا على أنماط التفكير المزعجة والمدمرة اللي ليها تأثير سلبي على سلوكهم وإزاي يغيروها.
6. التسامح بشكل أكبر مع الناس

وفي النهاية ..لو حضرتك أو حد عزيز عليك بيعاني من المشكلة دي أو أي مشكلة نفسية تانية فتقدر تتواصل معانا من خلال صفحتنا وهيرد عليك حد متخصص .. أو تقدر تتواصل على أرقامنا وتزورنا في أحد فروعنا وهتلاقي فريق متخصص تحت أمر حضرتك 😍

الشخصية الاضطهاديه Paranoid Personality

صفحتنا علي فيس بوك

إعداد :د / عمار أنور

مراجعة : د / حاتم صبري