الشخصية السيكوباتيه، كتير مننا ممكن يتعرض لحوادث نصب أو سرقة ونقعد نفكر مع نفسنا إزاي الناس اللي عملت كده ضميرها يسمح لها أنها تعمل سلوك زي دة وتقبل علي نفسها كدة😥.
طب مايروحو يشتغلوا ويعيشوا بالحلال ويعيشوا حياة أفضل 🤔 !!
خليني اقولكم إن حتى لو الناس دي لقت شغل مناسب بمرتب مناسب بردو هيفضل عندهم الرغبة انهم ينصبوا ويسرقوا 🤦 .. و ده بيكون بسبب إنهم بيكون عندهم اضطراب في شخصيتهم وهو اضطراب الشخصية المضادة للمجتمع antisocial personality disorder
طب تعالوا نفهم أكتر إيه هو اضطراب الشخصية ده ؟؟ 🙄
الشخصية اللي بتعاني من الاضطراب ده للأسف مابيعرفش يعيش كمواطن صالح ..
مش بيلتزم بأي قواعد سواء كانت إجتماعية أو دينية ..
مش بيحترم أي عادات أو تقاليد أو أي شيء في حياته ..
الشخصية السيكوباتيه
طول الوقت بيحاول يفكر ازاي يؤذي اللي حواليه ويطلع منهم بأكبر مكسب له .. والأذى ده ممكن يكون من أول الكدب والسرقة لغاية القتل وبيعمل كل ده من غير أي ذرة إحساس بالندم أو الذنب😣 !!
خليني أقولكم برده إن مش دي الصورة الوحيدة للشخصية دي 💁 واللي متمثله في السارق أو النصاب أو مدمن المخدرات اللي غالباً بيكون مكانهم في الآخر السجن 😐
أوقات بنلاقي الأشخاص دي بيكونوا بيلمعوا بزيادة .. يعني شكلهم حلو .. طريقة كلامهم مهذبه جدا وجذابين بشكل كبير .. بيتلاعبوا بالكلام عشان يقدر يقنعك .. وبيستخدموا كل ده علشان خاطر بردو يحصلوا على اللي هما عايزينه وبس ..
ده كمان ممكن نلاقي الشخص ده في وظيفة مرموقة جدا أو رجل أعمال مشهور أو حتى وزير 😏
طب امتى نقول على الشخص ده إنه بيعاني من اضطراب الشخصية المضادة للمجتمع؟ 🧐
اعراض اضطراب الشخصية السيكوباتيه
- بينتهك حقوق اللي حواليه بدون اعتبار مشاعرهم .. المهم مصلحته الشخصيه بس 💔
- مابيعرفش يحترم التقاليد و الأعراف و القوانين تماماً😤 ( شايف إن القواعد خلقت لخرقها )
- طول الوقت بيحب ينصب علي اللي حواليه عشان يحصل علي متعته الشخصية وبس😬وبيكون مستمتع جدا لما يشوف في عين الشخص اللي خدعه نظرة حسره
- طول الوقت مندفع في تصرفاته 🧜♂️ ماهو مش بيحسبها وبيشوف حلال ولا حرام ولا صح ولا غلط
- عنده دائماً سرعة استثارة وعدوان شديد و ده هنلاقيه بيظهر في خناقاته مع اللي حواليه 🤯 وده بنلاقيه في النوع اللي مش بيعرف يلبس قناع الهدوء والشياكه ودول الناس اللي بنقول عليهم بلطجيه
- مابيخفش من أي خطر ممكن يحصله أو يحصل لأي حد 😑 ماهو ماعندوش مشاعر كبيره تحسسه بالخوف والقلق وبيكون زي ابراهيم الأبيض 😂
- مابيعرفش يتحمل مسئولية أو يتلزم في شيء ( و دة طبعاً باين إلا كان التزم في شغل معين) 💁
- مش بيحس بالذنب تماماً تجاه اي سلوك بيعمله😟 يعني ممكن نلاقيه بيكذب ويسرق ويقتل وياخد رشوه ويحط مبررات لكل ده ويحسس نفسه ويحاول يحسس اللي حواليه كمان إن هو عنده حق وإن هو مش غلطان لكن الناس اللي اتأذت بسببه هي اللي تستحق اللي عملوا فيها ده 😱!!
وعشان أشخص الفرد بالاضطراب ده لازم يكون ..🧐
-تجاوز سن ١٨ سنة – وهو صغير كان عنده اضطراب في سلوكه يعني كان عدواني بشكل كبير و بيكدب كتير وممكن يسرق أو بيؤذي حيوانات أو بني أدمين أو اتحرش بحد
طب إزاي الإضطراب ده بيبدأ وإيه مساره؟ 👀
هنلاقي الشخص من صغره عنده اضطراب في سلوكه قبل سن ١٥ تقريباً ، وهنلاحظ انه بيبدأ عند الطفل الولد في مرحلة الطفولة ، والبنت في مرحلة المراهقة وغالبا بيقل السلوك ده بعد سن الثلاثين🤷
وهنلاحظ كمان إن ممكن يحصل فشل في دراسته وخاصة لو بدأ الإضطراب ده في الطفولة
طب ايه أسباب حدوث الإضطراب ده ؟ 🙄
- العوامل الوالديه/ وهي القسوة والمعاملة الجافة من الوالدين والعنف سواء جسدي أو لفظي و اللي بيخلي في سلوك عدواني وعصبي عند الفرد ده☹️
- إنفصال الأم والأب وعدم رعاية الطفل.😔
- إن أحد الوالدين أو أحد الأقارب بيعانوا من اضطراب الشخصية المضادة للمجتمع
- إن أحد الوالدين بيعانوا من مرض عقلي أو نفسي.🙁
- اضطراب علاقة الفرد بأمه منذ الطفولة زي مثلا إن أمه تكون قاسية أو غير قادرة على إشباع حاجات الطفل البيولوجية والنفسية.🥺
- سيطرة شخصية الأم أو غياب الأب
طيب نسبة إنتشار الإضطراب ده قد إيه ؟ 🧐
بتكون نسبته بين الرجاله ٣٪ و بين الستات ١٪
طب إيه هو علاج اضطراب الشخصية السيكوباتيه؟ 💊
للأسف الأشخاص دول مش بيكونوا شايفين إن عندهم مشكله في حاجه وده لإنهم شايفين إنهم بيقدروا ياخدوا حقهم في الحياه بدراعهم وبدماغهم وبيعرفوا يستغلوا الناس كويس وشايفين إن دي ميزه فيهم مش عيب وخصوصا لإنهم ماعندهمش إحساس بالذنب ناحية حاجه بيعملوها !!
علشان كده اللي بيجيب الأشخاص دول عادة للمستشفيات أو العيادات النفسية بيكون أهلهم بسبب المشاكل اللي دايما بيسببهلهم وعلاجهم بينقسم لجزئين
- علاج دوائي💊 :- وده بيكون على حسب الأعراض اللي ظاهره عليهم وعلى حسب هل بيعانوا من ادمان أو من اضطرابات نفسيه تانيه ولا لا
- علاج نفسي📝:- واللي بيتم من خلاله التحدث مع الشخص و التعاطف معاه وإعطاء له إحساس الأبوه والأمومه الي اتحرم منهم.. بالإضافة إننا نوجد طريقة لوقف سلوك الشخص المدمر من خلال بعض العلاجات السلوكيه والديناميه بجانب إكسابة مهارات وأفكار جديدة إيجابية تساعده علي التكيف في حياته بشكل سليم وده بيكون من خلال العلاج المعرفي السلوكي 💪
وفي النهاية ..لوعايز تعرف أكتر عن الاضطراب ده تقدر تتفرج على الفيديو .. ولو بتعاني من المشكلة دي أو حد عزيز عليك بيعاني من الاضطراب ده تقدر تستفسر من خلال صفحتنا أو تتواصل معانا من خلال أرقامنا أو تزورنا في أقرب فرع ليك من فروع عياداتنا .
مراجعة : د / حاتم صبري
0 تعليق