الشخصية التجنبية، تعالوا نكلم في الموضوع ده عن شخص بنقابله كتير في حياتنا سواء في المدرسة أو في الجامعة أو في الشغل أو في عائلتنا 🤗 ..

هنتكلم في الموضوع ده عن الشخص اللي بيكون في حاله أووي ومتجنب للاندماج في العلاقات الاجتماعيه بصوره كبيره 👦..

لما كنا في المدرسة أو في الجامعة ده بيكون الطالب اللي قاعد لوحده ملهوش دعوة بحد و كلامه قليل أوووي ، و بيكون عنده صحاب قليلين جدااا بيكون في أنشطة إجتماعية كتيرة نفسه يدخل فيها بس بيرفضها أو بمعني أصح بيتجنبها؟!💔

الشخص ده لما بيشتغل، بيلجأ عادة لعمل مافيهوش إحتكاك بالناس!! زي شغل IT أو شغل خاص بالكمبيوتر أو أي شغل مش هيبقى فيه تواصل كبير مع ناس غريبه عنه !!

الشخص ده عادة كمان بيتجنب آي مناسبة إجتماعية في الأسرة !!👩‍👩‍👧👨‍👩‍👦 في حين بيكون نفسه جداااااا يتعرف علي ناس جديدة و يكتسب صداقات أكتر و يجرب أشياء جديدة و نفسه يبادر بحاجة جديدة ..

كمان بيكون نفسه يدخل في علاقات عاطفية لكنه بيخاف وبيتجنبها 🙇‍♀️

للأسف في معظم علاقاته بالناس مش بيكون عنده المبادرة أو المغامرة🤦‍♀️ عارفين أحنا بنتكلم عن مين؟! 🤔

عارفين شخصية أحمد مكي في فيلم طير أنت؟

هو ده بقي المثال الحي للشخصية التجنبية 🤠

الشخصية التجنبية

اللي هيتعامل مع الشخص ده هيلاقيه:😎

1- شخص مش واثق بنفسه و تقديره لذاته منخفض جداااااا ..دايماً بيشوف نفسه أقل من اللي حواليه وان الناس أحسن منه في كل حاجه 🤦‍♀️

2- منشغل طول الوقت بعيوبه😞

3- الحساسية الشديدة جدااااا تجاه النقد أو الرفض.💔

4- منعزل إلي حد كبير جدااا 🥺

5- بيتجنب التعامل والإختلاط مع الناس ، فلو بيشتغل مثلا تلاقيه بيتجنب الإجتماعات مع زملائه في الشغل 🚶‍♂️

6 – اصحابه بيكون عددهم محدود جداااا (حوالي واحد أو اتنين بس من صحابه ) ،و في أوقات كتيرة مش بيكون عنده صحاب.👯‍♂️👨‍❤️‍👨

7- الشخص ده بيتجنب أنه يعبر عن رأيه وعن مشاعره خوفاً من السخرية منه أو النقد أو الاستهزاء بمشاعره .. بيكون حاسس إنه مايستحقش الحب .. و إنه مش هيقدر يقول للبنت إنه بيحبها بشكل صريح زي فيلم طير أنت هيحاول بطرق غير مباشرة 💔

8- بيعيش في أحلام اليقظة 💭💤 بأنه بيكون عنده صداقات كتيرة  أنه الناس كلها بتحبه ومعجبه بيه ومتقبلينه وأنه بيتكلم بحرية مع الناس وبيتعامل وبيتفاعل مع الناس بشكل عادي جدا من غير قلق، كل ده بيكون شكل من أشكال الهروب من الواقع لقطع حبل الأفكار المؤلمة والمزعجه بالنسبة للشخص .

ما هي الشخصية التجنبية؟

تعالوا نشوف المعايير اللي من خلالها بنشخص اضطراب الشخصية التجنبية علي حسب

DSM-5 لازم يتوفر (4) أعراض علي الاقل من المعايير ده، عشان نقدر نشخص الاضطراب ده :🤓

1- بيتجنب الأنشطة الاجتماعية و المهنية اللي بيكون فيها إحتكاك مع الاخرين، بسبب الخوف الشديد من ان الناس تنقده او ترفضه 😔

2- بيرفض الانخراط مع الناس و بيكون معتقد إعتقاد راسخ أنه مش هيكون محبوب من الناس.( في حين الشخص ده بيكون محبوب من اللي حواليه)

3- بيتجنب الدخول في العلاقات الحميمة بسبب الخوف من أن يكون موضع سخرية و خزي من الطرف الاخر.

4- منشغل طول الوقت بأنه موضع إنتقاد أو رفض في المواقف الاجتماعية عشان كده مش بيتكلم مع الناس بيخاف لو اتكلم الناس تضحك عليه أو تتريق عليه في حين توقعاته ديه بتكون نسبة كبيرة جدااا غلط ☹️

5- متثبط في المواقف الجديدة مع الناس بسبب الخوف من عدم الكفاءة 🙁

6- بينظر لنفسه علي أنه غير كفء إجتماعياً وغير جذاب أو أقل شأناً من الاخرين.💔

7- بيتردد بشكل غير عادي في تعريض نفسه للمجازفات أو الانخراط في أنشطة جديدة لأنها قد تظهر عليه الارتباك و الخجل😨

بيخاف من أي تجربة أو موقف جديد لو مثلا هيروح مدرسة جديدة بيكون مرعوب و مضطرب طول الوقت و بردوا لو رايح شغل جديد بيكون في حالة من القلق والتوتر الشديد …

البدايات بتكون عنده صعبة جداا و مقلقه جدااا ، و توقعاته بتكون سلبية و انه مش هيقدر يعمل حاجه و أن الناس هتتريق عليه و أنه شكله مش هيكون لطيف.😰😥

على فكرة …

الشخص ده بيكون عنده مهارات عالية جدا من الناحية الاجتماعية و المهنية بس للأسف بيتجنب كل ده!!!

اسباب ظهور الشخصية التجنبية

طب ايه السبب اللي يخلي شخص يتجنب كل حاجه في حياته كده في حين بيكون نفسه يكسر التجنب ده بس مش عارف؟🥴

1- سبب وراثي: ممكن يكون حد من الأهل عنده شخصية أصلا تجنبية.

2- التنشئة الاجتماعية: تعرض الشخص في الطفولة خصوصاً في أول 5 سنين من عمره لعقاب قاسي ، و اللوم المستمر و المبالغ فيه من الأهل ، و معاملة قاسية من الأهل ، و تعرض للعنف الأسري، و التدخل المبالغ فيه لحياة الطفل بحجة الخوف عليه و تجاهل مشاعره.💔

طب ازاي نتعامل مع الشخصية التجنبية :🤔🧐

كلامي الاول هيكون للاهل:🤠

• علموا أولادهم و هما في فترة الطفولة علي التقبل الغير مشروط (بلاش أعمل ده عشان أحب، أسمع الكلام عشان أحب أكتر )
• عدم النقد أو السخرية من تصرفات الطفل.😍
• توفير للطفل الحب والاهتمام والاحترام له.❤️
• عدم التدخل في حياة الطفل بشكل مبالغ فيه. بالعكس إعطاءه حرية للتصرف و الحرية له في التعبير عن رأيه و عن مشاعره.🥰

لو ليا صديق تجنبي أو شريك (ة) حياتي شخصية تجنبية اتعامل ازاي معاهم :😀

في البداية هيكون الشخص (التجنبي) بالنسبالك شخص غامض مش منفتح علي حياة و ملهوش في الاختلاط و لا الأنشطة الأجتماعية، دورك إنك تتقبله و عدم نقده أو السخرية منه و تشجعه إنه يعبر عن رأيه و عن مشاعره و عن أفكاره. مساعدته علي التواجد في الأنشطة الأجتماعية.

خد بالك و أنت بتتعامل مع شخص تجنبي: هيكون حساس أووووووووووووي يعني لو أتصل بيك وأنت مردتش عليه هيبدأ يفكر أنك مش عاوزه في حياتك أو انك مش مهتم بيه و……… و هيفكر في مليون فكره مقلقة -العلاج : بيكون عن طريق

1- العلاج الدوائي: 💊 للأسف لحد الآن مفيش أدوية لعلاج الاضطراب ده و لكن العلاج الدوائي بيكون للأعراض المصاحبه للاضطراب زي الاكتئاب أو القلق.

2- العلاج النفسي:

• مساعدته علي تعديل أفكاره (لأنه بينظر للأمور بشكل شخصنه أن الناس هتنقدوه و مش هيحبوبه لو اتكلم مثلا) 🤓
• مساعدته علي تنمية مهاراته الاجتماعية.🤠
• بنشتغل معاه علي تنمية الثقة بالنفس . وانه يحب نفسه❤️
• مساعدته علي التواجد في وسط مجموعة من الناس و التكلم معهم بدون قلق. وممارسة أنشطة إجتماعية. 😃
• مساعدته علي أنه يعبر علي مشاعره و أفكاره أمام الناس بدون الخوف من النقد والسخرية.😀

وفي النهاية ..لوعايز تعرف أكتر عن الاضطراب ده تقدر تتفرج على الفيديو .. ولو بتعاني من المشكلة دي أو حد عزيز عليك بيعاني من الاضطراب ده تقدر تستفسر من خلال صفحتنا أو تتواصل معانا من خلال أرقامنا أو تزورنا في أقرب فرع ليك من فروع عياداتنا .

مراجعة : د / حاتم صبري

• اضطراب عسر الجماع
• التشنج المهبلي
• الرهاب المحدد
• صفحتنا علي فيس بوك