وأنا طول ما أنا نايم عمال أحلم بكوابيس كتير مرعبه ..😫

وأنا مش عارف استمتع بأي لحظة في حياتي وطول الوقت بفكر في الموت 😞، وببص للي حواليا كأني بودعهم..😔

وأنا عندي خوف كبير أوي من المستقبل ومش عارف هيكون عامل إزاي 😟..

كمان خايف علي أولادي والناس اللي بحبهم لحسن أفقدهم في أي لحظة وبقعد أتخيل ده وأعيط كتير بسبب كده😢😢..

يوميا بيجيلنا في فروع عياداتنا عشرات المرضى اللي بيعانوا من الأعراض دي ومش بيكونوا عارفين هل ده مرض نفسي فعلا ..ولا ده مجرد قلة إيمان ونقص يقين زي ما كتير من اللي حواليهم بيقولوا ..

من المؤكد جدا إن كتير من اللي بيقرأ الموضوع ده دلوقتي ممكن تكون جاتله الأعراض دي قبل كده .. أو سمع من ناس حواليه إنهم بيعانوا من الأعراض دي 💁🥺 ..

للأسف الشخص اللي بيعاني من الاضطراب ده بيكون عايش يا حرام في ظلام وخوف وبيكون مش عارف يعمل أي حاجه في حياته بسبب الأفكار والمشاعر السلبيه اللي بيحس بيها طول الوقت..😓 وللأسف كل الأعراض دي بتدل إن الشخص ده بيعاني من اضطراب نفسي مشهور جدا اسمه..
اضطراب القلق العام Generalized anxiety disorders🤢 📷

طب يعني إيه إضطراب القلق العام ؟! 🤔

ده عبارة عن مشاعر خوف😱 غير مبرره ..بمعني إني حاسس معظم الوقت بخوف وقلق بس مش عارف أنا خايف من إيه ..

أو حتي لو خايف من حاجة معينة بيكون خوفي ده مالوش أي دليل موجود عشان أخاف😩 !!

 

 

طب إزاي نعرف إننا عندنا اضطراب القلق العام ؟؟؟🙄

بتختلف أعراض اضطراب القلق العام في شدتها من شخص لآخر ..ودي بعض اﻷعراض اللي بتكون موجوده عند المصاب باضطراب القلق العام ..🥺

• الشعور بخنقه وقبضه من غير سبب ..وإحساسه طول الوقت إن في مصيبة هتحصل ليه أو لحد حواليه 😨 في أوقات كتير ممكن تحصله نوبات هلع متكرره ( نوبات بيحس فيها إنه هيفقد حياته أو هيفقد عقله )😵

• الشعور بالإثارة أو الانفعال😖

• الشعور بوجود غصة في الحلق😷

• صعوبة في التركيز🥺

• سرعة التهيج والعصبية🤯

• التوتر العضلي معظم الوقت😣

• المشاكل في النوم أو في استمراره😴

• الألم في المعدة والقولون العصبي والصداع واﻹرهاق بدون سبب😓 .

كمان ممكن الموضوع يوصل بالشخص إنه يحس إنه مش حقيقي ..أو إن الدنيا دي مش حقيقيه وإنه كأنه عايش في حلم.. وساعات اﻹحساس بيوصل بيه لفكرة إنه خايف إنه يفقد عقله😵!!
وطبعا الفكرة دي بتخوفه وتضايقه جدا 😢😢

 

طب إيه أسباب الاضطراب ده .. أو ليه بيحصلي كده ؟؟🤦😣

زي كتير من اﻷمراض مفيش سبب واضح لحدوثها ..لكن لقوا إن في عوامل بتساعد في حدوث الاضطراب ده منها:💁

1-العوامل البيولوجية:-

بتفترض بعض النظريات إن النورأدرينالين و الجابا و السيروتونين في الفص الأمامي و الجهاز الطرفي من المخ مشتركين مع بعض في حدوث الإضطراب ده👀
الوراثة : 25٪ من المصابين بالاضطراب ده أقاربهم من الدرجة الأولي كمان كانوا بيعانوا منه وده بيوضح دور الجينات الوراثية اللي بتسبب اضطراب القلق العام✋

2– العوامل النفسية و الاجتماعية: –

ده بيكون بسبب الضغوطات النفسية اللي بيمر بيها الإنسان في حياته سواء في عائلته أو في شغله أو مع أصحابه فبيعمل عملية كبت لكل الضغوط دي أو إنه ممكن يستخدم حيل دفاعية تانية زي النقل والنكوص وبيكون بطريقة لاشعورية و ده اللي بينتج عنه اضطراب القلق العام😟

طب إيه هو مآل ومسار اضطراب القلق العام؟🤨🤨

اضطراب القلق ممكن يبدأ في أي سن.. بس هنلاقية أكتر في العشرينات والثلاثينات وساعات وخصوصا مع عدم العلاج السليم ممكن القلق يفضل مستمر مدى الحياة 🤦،
بتوصل مضاعفاته إنه يحصل نوبة هلع شديدة أو تحصل أعراض إكتئاب شديدة بسببه ..

ده كمان في بعض الأحيان ممكن الموضوع يوصل بالشخص إنه يقرر ياخد مخدرات 😫

طب إيه هي نسبة إنتشار الإضطراب ده !!🧐

الدرسات قالت إن نسبة انتشاره من 2-5٪ …
و كمان نسبة الإصابة بين الذكور والإناث متساوية وفي بعض الدرسات قالت انه بيبقي اكتر عند الإناث بنسبة 1:2 🤷

نيجي بقي لأهم حاجة..👌 وهي علاج إضطراب القلق العام ..ازاي بنعالج الاضطراب ده في عياداتنا ؟؟ ..

العلاج بينقسم لقسمين هما .. .

1– علاج دوائي💊:-

وده بيكون من خلال بعض الأدوية المضادة للقلق والاكتئاب وبالجرعات اللي بتتناسب مع طبيعة الحالة وطبيعة الفحص النفسي

2– العلاج النفسي📝:-

طيب إيه الخطوات اللي بنعملها مع العيان في العلاج النفسي عشان نساعده إنه يتخلص من الاضطراب ده ؟؟؟🤔

1) التفهم🤝 ودي أنا بعتبرها من أهم خطوات العلاج وده ﻹن مريض القلق بيعاني جدا وفي نفس الوقت اللي حواليه عادة مش بيكونوا حاسين بيه ﻹنهم مش بيكونوا قادرين يتفهموا إن ده مرض ولازم ليه علاج .👉

2)توعية اﻷهل👫 :لازم نقعد مع اﻷهل أو مع الزوج ونعرفه إن ده مرض وإن كل المعاناه اللي عند ابنهم أو بنتهم دي مش بمزاجه .. وإنه عمره ماهيقدر يتغلب عليها بالنصايح السطحية اللي بيقولوها ليه زي (لازم إيمانك  يبقى قوي شوية . ماتفكرش . اقرأ قرآن .صلي) ﻹن طبعا كل دي أكيد  حاجات كويسه لكن مش هتساعده .🙃 .. وكمان اﻷهل بيساعدونا في العلاج ﻹن كتير بنلاقي إن اﻷهل أصلا شخصيات قلوقه وهما جزء من مصدر القلق عند المريض ده ☹️

3) بنشتغل علي أهم حاجة وهي أفكار المريض لإن أساساً من ضمن أسباب شدة المرض هي أفكار المريض السلبية أو القلوقة .. احنا هنا بيبجي دورنا إننا بنصحح الأفكار السلبية أو الأفكار القلوقة دي سواء عن نفسه أو عن اللي حوليه أو عن المستقبل
4) كمان بيتم التعامل مع الظروف والأحداث المسببه لاضطرابه وعلاجها أو تعليم المريض كيفية التعامل معها عن طريق تعليمه الطرق السليمة للتعبير عن المشاعر ، ولما يتعرض لمواقف ضغط المفروض يتصرف إزاي ..
كمان بيتم تعليمه ازاي يعرف يخلي الأحداث المثيرة للقلق غير مسببه للقلق عنده ويقدر يسيطر عليها بسهوله 💪

طيب العلاج بياخد وقت قد إيه ؟؟؟🤔

بتبدأ علامات التحسن تظهر في خلال أسبوعين✌️ إن شاء الله لغاية مايوصل للطبيعي في فترة وجيزة إن شاء الله على حسب مستوى حالته وشدتها ومقدار تجاوبه مع جلسات العلاج النفسي ..بالاضافة لطبيعة حياته ودعمه الأسري والإجتماعي 💪❤️

وفي النهاية ..لو عايز تعرف أكتر عن الموضوع وتفاصيل أكتر عن العلاج تقدر تشوف الفيديوهات دي ..
و لو بتعاني من الاضطراب ده أو أي اضطراب نفسي تاني تقدر تستفسر من خلال صفحتنا .. أوتتواصل معانا من خلال أرقامنا .. أو تزورنا في أقرب فرع ليك من فروع عياداتنا ..

إعداد : أستاذة / إيمان محمد

مراجعة : د / حاتم صبري