انت مش أنت بعد صدمة حصلتلك فى حياتك 🤕..
بعد موت أقرب الناس ليك .
.بعد حادثه عربية حصلتلك على طريق فجأة
صدمات كتير بتعدى عليك بتخليك تحس إن روحك راحت فجأه !!
مابيبقاش للأكل طعم ، و لا بقى للحياة لون !!
دايما قلقان دايما عايش فى الحدث اللى حصل و كأنه امبارح وبتحاول تتجاوز لكنك مش قادر وعايش فى امبارح .😥
بتحس ساعتها فعلا إن بينطبق عليك أغنية مصدومة بجد و مش بنطق و لا عارفه أرد..💔
علشان كده لازم تبقى واعى بنفسك وباللي حواليك اللي بيعانوا من حاجة زي كدة 🧐 و تعرف إن دة اضطراب نفسي واسمه ” اضطراب الإنضغاط الحاد ” Acute stress disorder
طب إيه هو تعريف الاضطراب ده؟🤔
هو قلق بيكون مميز بيحصل خلال شهر من التعرض لحادثة معينة .. ووقتها بيحس بمشاعر عجز ويأس وبيحصل إعاقة تامة للجانب الوظيفي والاجتماعي في حياة الشخص ده ، وده عبارة عن شكل تاني من أشكال اضطراب كرب ما بعد الصدمة
طب امتي بنقول على شخص بيزورنا في عياداتنا إنه فعلا بيعاني من إضطراب الإنضغاط الحاد؟؟ 🙄
1- لما الشخص يتعرض لحادث أو موت نجا منه بأعجوبة أو اتعرض لإصابة كبيرة أو إنه اتعرض لإعتداء جنسي كبير
2- شاف حادثة مميته حصلت للناس اللي حواليه و بيفضل بيعيش الحدث كل شويه
3- طول الوقت بيفضل الشخص ده يفكر في الحادثة اللي حصلتله بشكل لا إرادي
4- بيحلم دايما بكوابيس ليها علاقة بالحادثة
5- كل مايتعرض لموقف قريب من الحادثة الي حصلتله بيحصله ذعر وانزعاج
6- هنلاقيه مش قادر يحس بأي مشاعر إيجابية زي مشاعر السعادة أو الرضا أو مشاعر أمل
7- ممكن كمان نلاقيه ناسي تفاصيل مهمة جدا في الحادثة ومش قادر يفتكرها
8- بيبذل مجهود كبير أوي إنه يتجنب الذكريات المزعجة أو الأفكار أو المشاعر المرتبطة بالحادثة وكمان الأماكن و الناس اللي ليها علاقة بالحادثة
9- بيكون سريع الاستثارة و بيتعصب جدا حتي لو كان لسبب تافه
10- بيكون عنده صعوبة في التركيز
11- بيحصله إضطرابات في النوم
طب إيه هو بقي مسار إضطراب الإنضغاط الحاد؟؟ 👀
في العادة بيكون مدته يومين ل أقل من شهر وعادة بيتعافى من نفسه .. أو مع بعض الأدوية النفسية البسيطة .. أو مع بعض جلسات الدعم النفسي ..ولو استمر أكتر من شهر بيدخل في إضطراب آخر وهو إضطراب كرب ما بعد الصدمة
طب إيه هي أسباب الإضطراب دة؟🧏🏻♀️
زي ما اتفقنا .. ده بيكون بسبب وقوع حادث صادم اتعرض ليه أو شافه بيحصل للناس اللي حواليه و سبب ليه خوف وألم وضغط شديد جدا
طب ازاي بنعالج الاضطراب ده لما بيزورنا المريض في عياداتنا 🤝🏻 ؟؟
بيكون عن طريق قسمين
1- العلاج الدوائي وبتكون بعض الأدوية الخفيفة المضادة للقلق والإكتئاب 💊
2- العلاج النفسي : ومن خلاله بنشتغل على تعديل
– البناء الإدراكي للشخص ،
– بندربه على تمرينات التنفس والاسترخاء
– التعرض التخيلي للتخلص من المشاعر والانفعالات السلبية ،
– الاندماج في مجموعات الدعم زي الأسرة والأصدقاء👨👩👦👦
وفي النهاية … لو حابب تعرف أكتر عن الاضطراب ده تقدر تتفرج على الفيديو .. ولو بتعاني من الاضطراب ده أو حد عزيز عليك بيعاني من الاضطراب ده أو أي اضطراب نفسي أخر تقدر تستفسر على صفحتنا أو تتواصل معانا من خلال أرقامنا أو تزورنا في أقرب فرع من فروع عياداتنا
إعداد : أستاذة / إيمان محمد
مراجعة : د/ حاتم صبري
0 تعليق