الشخصية الوسواسية، في مثل بيقول أمشي صح يحتار عدوك فيك 💁
الشخصية اللي هنتكلم عليها دي مابتعرفش تعمل حاجة غير انها تمشي عدل وتعمل كل حاجة مظبوطة وبالمسطرة 👌..
محدش يقدر يمسك عليهم اي غلطة ، بالعكس هو اللي طول الوقت بيحاول يتصيد أخطاء الاخرين 🧐 و ما بيقبلش بأي خطأ ..
الشخصيه اللي هنناقشها دلوقتي .. لو كان عندك مشروع وربنا بيحبك أوي وأراد ليك النجاح يبقى غالبا ربنا هيرزقك بمساعد أو شريك من الشخصيه دي 😊
أما بقى لو انت شخص مهمل وربنا عايز يكفر عنك كل سيئاتك اللي عملتها في حياتك فغالبا ربنا هيبعتلك الشخص ده في صورة رئيس في العمل أو في صورة شريك حياتك 😊
شخصية النهارده شخصية في منتهى الانضباط لكن للأسف برده في منتهى عدم المرونه !!
لو الشخص ده كافح علشان خاطر النجاح والمجد الشخصي ربع اللي بيكافحه عشان خاطر يحافظ على نظام الأشياء وتبقى كل حاجه منظمه كان هيبقى أعظم حد في الدنيا وده لانه في أوقات كتير بيبقى مدمن للعمل !!!
طول الوقت بيرسم خطط وجداول لكل خطوه هيمشي فيها وبيحسب كل تفصيله صغيره وكبيره بالورقه والقلم وبيضيع في الحسابات دي كل طاقته 📖📘 !!!
الشخصية الوسواسية
وﻹن طاقته بتروح في تفاصيل مالهاش قيمه فالشخص ده بيجي عند أخر وأهم نقطه ومابيعرفش يتعامل معاها وبيفشل فيها وطبعا النتيجه بتكون الفشل وللأسف بيرمي صاحب الشخصيه دي اللوم ساعتها على المجتمع الغير منضبط أو على حظه العاثر !!!!
طول الوقت بيكون عايز يوصل للكمال .. ولإن مافيش حاجه اسمها كمال فده بيخليه مايستريحش أبدا 🤕🤕 !!
الشخص ده معظم الوقت حاسس إنه متأخر وإن وقته ضاع ولازم يلحق 🙈!!
الشخصية دي بتحط قيود شديده على كل حاجه بيتعامل معاها … بنلاقيه طول الوقت بيلوم اللي حواليه وغير مرن تماما في علاقاته الاجتماعيه يعني لازم اللي في دماغه يتنفذ يا إما مايستريحش😬😬 …
بيكون قاسي جدا في حكمه على الناس اللي بتخالفه أخلاقيا وبيصدر عليهم أحكام قاسيه أوي لمجرد إنهم مخالفين لعاداته 😱😱!!!
كمان الشخصيه دي بتكون عنيده جدا جدا بيحاول بكل الطرق يقنع الناس اللي حواليه
انها تتعامل بنفس أسلوبه في الحياه وبيستغربوا جدا ويستاءوا لما حد يخالفهم في أي عاده من عاداتهم !!!
(ملحوظه : كلنا عندنا جانب وسواسي في شخصيتنا بيساعدنا على ترتيب أهدافنا وأولوياتنا ونهتم بالتفاصيل …لكن طبعا بيكون عندنا مرونه نتقبل اﻷشياء الجديده ) لكن الشخصية دي هنلاقيها معندهاش مرونة تماماً ، وبتحاول تبذل اقسى جهد فيها عشان تتبع النظام و القواعد 🙁 ..
طب أمتي اقدر اشخص ان الشخص دة بيعاني من اضطراب الشخصية الوسواسية ؟؟ 👀
- طول الوقت منشغل بالتنظيم و الترتيب وبيحاول يسيطر علي نفسه وعلي علاقاته الشخصية👉
- بيحاول ينظم خطواته بشكل دقيق وتفصيلي جدا لدرجة انه ممكن يقعد ينظم لنشاط معين لوقت كبير و بيستغرق في التفاصيل وبينسى الهدف والمغزى من اللي بيعمله 🤏
- ممكن انه ما يبدأش أو ميكملش مشروع معين كان بيخطط ليه بسبب بعض القيود والشروط الغير مهمه لكنه بيتعامل معاه بعدم مرونه 🤦
- بياخد وقت كبير جدا في شغله علي حساب وقت فراغه واستمتاعه وبالرغم من كده بيحس إن في حاجات كتير ناقصاه في شغله 😥
- طول الوقت بيركز وبيدقق مع الناس وممكن يلومهم أو يلوم نفسه وخاصة في الأمور اللي بتتعلق بالقيم والاخلاقيات☹️
- عنده صفة الاختزان وده معناه إنه مايقدرش يتخلص من الأشياء اللي تخصه حتي لو مالهاش قيمة😏
- بيتردد جدا في إنه يخللي حد يقوم ببعض الأمور بالنيابه عنه .. لإنه مش بيكون واثق في قدرتهم على الأداء بطريقه مناسبه
- حريص الي حد ما في الإنفاق المادي لمرحلة إنه ممكن يوصل لدرجة البخل 🌚
- بيظهر صفة العند وعدم المرونة😤
طب إزاي الإضطراب دة بيبدأ وايه مساره؟ 🧐
هنلاقي ان الإضطراب ده زي معظم اضطرابات الشخصيه بيدأ من بداية سن الرشد 💁
وساعات بيتحول الاضطراب ده في مساره لاضطراب الوسواس القهري ، وبعض الأشخاص ممكن يعانوا من توهم المرض أو الاكتئاب💔
طيب ايه نسبة انتشار الإضطراب ده ؟🧐
غير معروف بالتحديد ولكن بعض الأبحاث بتقول إن نسبته حوالي من ٢ ل ٨ ٪ ..و نسبة وجودة بتكون اكتر عند الذكور وأقارب الدرجة الاولي خاصة لو كانت عائلته شديدة النظام😖
جينا بقي لعلاج اضطراب الشخصية الوسواسية؟؟
وبينقسم علاج إضطراب الشخصية الوسواسية الي:
١- العلاج الدوائي💊:-
من خلال عقاقير SSRI ولكنها معظم الوقت مش بتكون طريقة العلاج الأساسية للإضطراب ده .. لكننا بنحتاجه في بعض الأوقات وخصوصا لو بدأ يحصل للشخص ده أعراض وسواسيه شديده أو بدأ تظهر عليه أعراض اكتئابيه أو ذهانيه شديده .
٢- العلاج النفسي📝:-
– للأسف معظم الأشخاص اللي بيعانوا من الاضطراب ده مش بيكونوا شايفين ان عندهم مشكله في حياتهم وده اللي بصوره كبيره ممكن يكون عائق ناحية مساعدة الشخص اللي بيعاني من المشكله دي علشان كده بيكون مهم جدا خلق علاقة علاجيه بين المعالج و العميل –
معرفة أفكار الشخص وتفنيدها ومعرفة مشاعره حوالين الأفكار والسلوك الناتج عنها
العمل علي تغير اخطاء التفكير المتمثلة في (يجب و ينبغي) وتدريبه علي المرونة في التفكير ووضع افكار بديلة وممكنه-
اكسابه عادات صحيه في يومه مثل الاستمتاع بوقت الفراغ وممارسة الرياضة –
تدريبه علي تمرينات التنفس والاسترخاء لمساعدته على التخلص من مشاعر السلبية –
تمرينه علي قراءة مشاعر الاخرين من خلال الذكاء العاطفي ومرعاة الجانب الإنساني في معاملته مع الآخرين –
تدريبه علي ترتيب الأولويات وتنفيذها بدون إهدار وقت وجهد في التنظيم والترتيب –
في أوقات كتير بيكون العلاج النفسي التحليلي من الحاجات المهمه جدا لمساعدة المريض على تجاوز كتير من تصرفاته اللي بتأثر على حياته .
وفي النهاية ..لوعايز تعرف أكتر عن الاضطراب ده تقدر تتفرج على الفيديو .. ولو بتعاني من المشكلة دي أو حد عزيز عليك بيعاني من الاضطراب ده تقدر تستفسر من خلال صفحتنا أو تتواصل معانا من خلال أرقامنا أو تزورنا في أقرب فرع ليك من فروع عياداتنا .
مراجعة : د / حاتم صبري
أسئلة طرحها الآخرون
ما هي الشخصية المرتابة؟
من هم الاشخاص الاكثر عرضة للوسواس القهري؟
ما الفرق بين الشخصية الوسواسية والوسواس القهري؟
ما هي الشخصية الارتيابية؟
عمليات البحث ذات الصلة
- صفات الشخصية الوسواسية
- الشخصية الوسواسية والزواج
- كتاب عن الشخصية الوسواسية
- اختبار الشخصية الوسواسية
- كتاب اضطراب الشخصية الوسواسية
- الفرق بين الشخصية الوسواسية والوسواس القهري
- الشخصية الوسواسية القلقة
- الشخصية الوسواسية pdf
0 تعليق