التبول الليلي، تجهيز الولاد للمدرسة الصبح كابوس 🥴..

تفضل الأم تلف حوالين نفسها عشان طفلها بهدل هدومه و هو نايم 😭😭

ياخد دش قبل ما ينزل 🛀و لازم تغير ملاية سريره .. رغم أنها بتقلق من نومها كتير بالليل عشان تصحيه يدخل الحمام عشان يصحي نضيف 😔لكن برضه كل يوم يصحى مغرق هدومه …

دي للأسف مشكلة موجودة فى بيوت كتير لكن الأمهات بيعتبروها سر خطير لأنهم بيتكسفو يتكلمو فيها حتى مع القريبين ، و عدد قليل اللى بيكون عنده الوعى إنه يتعامل مع المشكلة 👏و يطلب تدخل طبى للتبول الليل

طيب مبدئيا كده ايه هو التبول الليلي ( التبول اللاإرادى ) ؟ 🤦

ده معناه تكرار تصريف الطفل للبول بعد سن من المتوقع إن الطفل فيه قادر بيولوجيا إنه يتحكم فى خروج البول من المثانة و يستخدم الحمام لوحده لما يحس إنه عايز يدخل الحمام ، و ده غالبا بيحصل فى الليل وقت النوم 😴😴🥱

ماهو مهم جدا نعرف ..

إن جسمنا كله بيشتغل عن طريق تنبيهات 🔔 بتوصل للمخ من أعضاء الجسم المختلفة بإحساس معين ، فبناء عليه المخ 🧠 يترجم الإشارات دى لأفعال تانية جسمنا على أساسها يتصرف 🗣️👀 .. حاجة بتكون كده شبه اشعارات الموبايل 📲 اللى بتوصل لينا واللي على أساسها هنحدد هستخدم دلوقتى أنهى ابلكيشن ..
أو مثلا زى أنى احس بالجوع فأقوم اتحرك عشان اجهز أكل ، أو أحس بالعطش فأقوم اشرب ، أو أحس بضوء فجأة ناحية عنيا فاقفلها بسرعة ..

أول لما بنتولد بنكون لسة مجرد كائنات بيولوجية 🧑‍🍼 بنعتمد على الكبار فى اشباع كل احتياجاتنا الفسيولوجية ،و لسة ماتعلمناش ازاى نعمل ده بنفسنا ، ولا نقدر نفهم احنا حاسين بإيه دلوقتى ❗.. و المفروض أن النضج العصبى اللى يخلى الطفل قادر يدرك التنبيه اللى بيوصل للمخ بإنه دلوقتى عايز يستخدم الحمام بيحصل ف سن من 2 ل 5 سنين .. بعد السن ده لو الطفل ماقدرش يتحكم فى البول لحد ما يوصل للحمام نقدر نعتبرها مشكلة محتاجة مننا ناخد خطوات لحلها ،

طيب أوقات الطفل بيكون خلاص قادر يتحكم فى البول أثناءالنهار 🌞 لكن مابيعرفش يعمل ده و هو نايم 😴🌜فلما تتراكم كمية بول فى المثانة تخرج تلقائيا من غير ما الطفل يحس ، فميصحاش 😞🙄

طيب ده بيكون ايه أسبابه ؟؟! 😩😩😢

الموضوع ده ممكن يكون وراه أسباب كتير جدا منها أسباب فسيولوجية أو أسباب نفسية أو أسباب ليها علاقة بالبيئة الاجتماعية اللى عايش فيها الطفل

⚫خلينا أول حاجة نتكلم عن الأسباب الفسيولوجية :

1️⃣  أول سبب الإفراط فى انتاج البول الليلى : الطبيعى إن كمية البول اللى بتفرز فى المثانة وقت الليل 🌃 أقل من نص الكمية اللى بتتفرز فى النهار 🌄عشان فى هرمون بتفرزه الغدة النخامية وقت الليل مضاد لإدرار البول ، فالأطفال اللى بيحصل لهم تبول لاإرادى ممكن يكون عندهم نقص فى إفراز الهرمون ده ، فكمية البول وقت الليل تبقى أكتر من الطبيعى 🌧️🌧️

2️⃣ عدم الاستقرار فى عمل المثانة : يعنى الطفل ممكن يكون سعة المثانة عنده أقل من الطبيعى🤏 فتستوعب كمية بول أقل من العادى ، فبالتالى برضه المخ بياخد إشارة بإفراغ المثانة رغم إن كمية البول فيها مش زيادة لكن الكمية الموجودة في المثانة مش قادرة تحتفظ بيها ☹️☹️

3️⃣اضطراب النوم : لما الطفل بيستغرق فى مرحلة النوم العميق فمش بيستجيب لتنبيه المخ بأنه يصحى لإفراغ المثانة ، زى مابنقول بالدارج كدة نومه تقيل ، أو يكون الطفل  مواعيد نومه مش منتظمة ⏰فنشاط جسمه فى الليل مايختلفش عن نشاط جسمه فى النهار 🌅🌌و بالتالى بتزيد برضه كمية البول أثناء الليل ، و الطفل مايقدرش يتحكم فيها 😔

⚫كمان فى أسباب عضوية زى

: – التهابات المسالك البولية . – بعض الأمراض زى السكر و فقر الدم أو السمنة المفرطة . – تأخر عام فى النمو فيتأخر سن ضبط البول و كفاءة عمل الكلى و الجهاز البولى .

و فى كتير من الحالات بيكون الطفل معندهوش أى مشكلة عضوية أو فسيولوجية بس بيكون السبب فى أنه يعانى من التبول الليلي أسباب نفسية منها مثلا

: 1- الخوف 😧

سواء كان خوف من العقاب مثلا لو هو عايش فى محيط أسرى بيتعامل فيه بقسوة 😡 أو خوف من الضلمة و هو نايم ، أو يكون بيحلم أحلام مرعبة 👹أو مشاهد العنف اللى للأسف بقت منتشرة جدا فى الأفلام ، أو لو شاف خناقات فى الشارع .

2- الغيرة 🤪

و دى بتظهر عند الطفل الأكبر لما بيتولد بعده مولود تانى ، فيرجع تانى يتصرف تصرفات الطفولة عشان يكسب تانى اهتمام الأم اللى ممكن يكون حس أنها بتهمله و تهتم أكتر بالمولود الجديد 🤨 فيبقى عايزها تغيرله هدومه كتير مثلا زى الطفل الصغير ده و ياخد نفس الاهتمام ، و خلينا متفقين إن طبعا ده برضه بيكون بشكل لا إرادى يعنى مانقولش الطفل بيتدلع و نعاقبه بقسوة لأن ده ممكن يزود المشكلة بدل ما يقللها 😑😑

3- التفكك الأسرى والحرمان العاطفى 💔💔

المشادات اللى بتحصل بين الأب و الأم أو أى شخص من الكبار حواليه بتزود عنده الإحساس بالخوف 😧… و كمان لما يكون مش بياخد قدر كفاية من الرعاية و الاحتواء و الحنية 🥰😍… كمان أوقات بيكون التبول اللاإرادى رد فعل انتقامى👻 ف عقل الطفل من غير وعي بيرد على الإهمال أو القسوة اللى بيتعرض لها ، فيكون عايز يتعب الأسرة اللى مش موفراله اهتمام أو حاسس فيها أنه منبوذ و مرفوض 😩 🚫….

ممكن كمان يكون التبول اللاإرادى بسبب طبيعة أكل الطفل : أوقات بيكون فى نوعيات أكل بتزود نشاط

المثانة زى الكافيين مثلا اللى موجود فى مشروبات زى القهوة و النسكافيه ☕☕ و الأطعمة الجاهزة اللى فيها محسنات طعم 🍩🍫🍬🧁… الحمضيات و الموالح زى الليمون و البرتقال مثلا 🍊🍋عشان كدة مهم ننظم أكل أطفالنا و ناخد بالنا كويس من طبيعة الأكل اللى بياكلوه خصوصا فى الفترات اللى قبل النوم 🥱

طيب ايه تأثير التبول اللاإرادى على الطفل و أسرته ؟ ‼️

1- التبول الليلي بيزود حدة المشكلات السلوكية عند الطفل خصوصا العند و العنف لأن الطفل بيكون حاسس بتقدير منخفض تجاه نفسه ، و حاسس برفض الأسرة له 😔☹️💔

2- ضغط الوقت و التوتر العصبى فى الجو الأسرى بسبب الاحتياطات الإضافية وقت النوم 😠😫

3- مشاعر الخجل عند الطفل و تجنب الأسرة كلها الزيارات الاجتماعية اللى هتطلب مبيت برة البيت عند حد من القرايب مثلا 😔🤭

4- الإحساس بالدونية عند الطفل اللى بيعانى من تبول ليلى خصوصا لو كانوا الأب أو الأم بيقارنوا الطفل ده باخواته اللى مش بيمروا بنفس المشكلة سواء فى نفس عمره أو اكبر أو اصغر 💔☹️

طيب ايه هى الطرق اللى ممكن بيها نعالج المشكلة ؟ ‼️🤔

فى وجهة نظر استسلامية بتقول سيبيه كل العيال بتبقى كدة و هما صغيرين و لما يكبر هيبطل لوحده 😕 .. ده اوقات كتير بيحصل فعلا و بيتوقف التبول اللاإرادى مع توقيت البلوغ و ده بسبب طبيعة التغيرات الهرمونية للجسم 🤗 .. لكن ليه أسيب طفلى يعانى و أنا كمان اتحمل عبء زيادة فى تجهيز مكانه كل يوم قبل النوم و تنضيفه لما يصحى .. لما ممكن أخد خطوات تساعدنى انهى مشكلة طفلى بدرى !! 😌

أول الأبواب اللى بنخبط عليها.. هو باب الفحص الطبى🩺 .. عشان نستبعد الأسباب العضوية أو نأكدها و ياخد الطفل الأدوية المناسبة لو تطلب الأمر 💊 فمهم نتأكد من سلامة الكلى و المسالك البولية ، و خلو الحبل الشوكى من أى عيوب خلقية ، و فى حالة اتأكدنا أن مفيش حالة طبية هى السبب الرئيسى🧬 بنبدأ نستخدم طرق تانية و نشوف أنهى هتبقى فعالة أكتر مع الطفل.. ♥️

فى توجه فى العلاج النفسى بيقول أن كل سلوكياتنا بيحكمها ارتباطات بين سلوك معين و نتيجته 🛎️ فالسلوك اللى نتيجته تبسطنى هيستمر 🥰💃 و السلوك اللى هيتسبب لى فى مشاعر سلبية هيختفى بالتدريج 🤏😥 و إننا ممكن نكتسب أى عادة جديدة بالتدريب المستمر عليها 💪👏 و بناء على التوجه السلوكى ده ممكن نستخدم شوية طرق :

طرق علاج التبول الليلي

1 – اعمل للطفل جدول أيام 🗓️ و احددله جايزة مثلا تبقى لعبة أو حاجة طلبها منى و وعدته بيها🎉🎈 تبقى شرط أنه يصحى عدد معين من الأيام من غير ما يبل سريره ، و هنا الأيام اللى هيتبول الطفل فيها أثناء نومه تكون هنا الأثر السلبى فمفيش داعى الومه لأن التأنيب هيزود مشاعر الدونية عند الطفل😔 و الأحسن إنى اشجعه على الأيام اللى هيصحى من نومه جاف 🎉

2 – تقسيم ساعات الليل حسب ملاحظة الأم الطفل بيبلل سريره بعد ما يكون نام قد ايه ! 🧐⏰و قبل المدة دى الأم تصحيه يروح الحمام 📢 وميخرجش غير لما يفرغ المثانة 🚽 و هنا هى بتعود الجهاز العصبى للطفل يصحى فى وقت قريب من تنبيه المثانة بالامتلاء 🛎️

3- لو كان الطفل كبير شوية مثلا فى المرحلة الابتدائية و لسة مستمر فى التبول اللاإرادى ، مهم هنا انه هو اللى يتحمل عبء تنضيف سريره لما يصحى و يجهزه لنفسه قبل ما ينام 🧼 👕👖و ده بيعتمد على تقليل فكرة انه التبول اللاإرادى بيخلى الطفل يكسب اهتمام و رعاية زايدة من الأم ✋ ده غير أنه بيدعم عنده الإحساس بالمسئولية 💪 و كمان يحس بالأثر السلبى للتبول الليلى ، فبالتدريج يبدأ يقل السلوك ده لأنه مش سلوك سار بالنسبة له ♥️🤗

4- تدريب الاحتفاظ ⏳ و ده بيتم أثناءالنهار إنى اعمل تأجيل لدخول الحمام ، عشان يحس يبتدى يدرك تنبيه إحساس امتلاء المثانة 📢 وأحاول اخليه يمسك نفسه شوية وقت و ازود الوقت ده بالتدريج و ده بيقوى عضلات المثانة ، و بيزود سعة البول اللى تقدر المثانى تستوعبها أثناء الليل لحد الطفل ما يصحى من نومه 🥱🥱

و ممكن كمان نستخدم طريقة النظام الغذائى✅✅

بأنى أقلل للطفل نوعيات أكل معينة اللى بتزود نشاط المثانة و أمنع❌🚫 تناولها قبل النوم بوقت كفاية زى العصاير و الألبان 🥛🥤🧋🧃 والفواكه المائية زى البطيخ مثلا أو الخضار زى الطماطم 🍓🍉🍅🍍وأحاول امنع أى مأكولات فيها مواد حافظة 🍬..

و مهم كمان افتكر احافظ علي مكان دافي للنوم 🔥خصوصا وقت الشتا لأن اوقات التبول الليلي بيزيد اثناء البرد ⛄🏔️ او الطفل يكسل يقوم من تحت بطانيته للحمام ، و كمان اعمل حسابي اسيب لمبة مفتوحة💡🔦 ف طريق الطفل للحمام عشان ميخافش يقوم بالليل لوحده ♥️♥️

وفي النهاية لو حابب تعرف أكتر تقدر تتفرج على الفيديو ده .. لو حد عزيز عليك بيعاني من المشكلة دي أو أي مشكلة نفسية تانية فتقدر تتواصل معانا من خلال صفحتنا وهيرد عليك حد متخصص .. أو تقدر تتواصل على أرقامنا وتزورنا في أحد فروعنا وهتلاقي فريق متخصص تحت أمر حضرتك 😍

إعداد : أستاذة / نورهان

مراجعة : د / حاتم صبري

• صعوبات التعلم
• نقص الإنتباه وفرط الحركة
• صفحتنا علي فيس بوك